علق الإعلامي كريم رمزي، على تجاوز جماهير الأهلي مع مارسيل كولر المدير الفني لفريق الكرة الأول بالأهلي في المشهد الختامي لبطولة دوري أبطال أفريقيا.
وكتب كريم عبر حسابه الشخصي بموقع التواصل الإجتماعي فيسبوك: “يوم ٩/٩/٢٠٢٢ الأهلي أعلن التعاقد مع مارسيل كولر مدير فني للفريق، وقتها موسيماني كان سايب للأهلي نسخة سيئة جدا في كل البطولات اللي بيشارك فيها.. ومن بعده ظهور خافت جدا لسواريش”.
وتابع: “في الوقت ده كان جمهور الأهلي بيطالب برحيل حسين الشحات، وعلي معلول كبر، ومحمد هاني ناشيء، وكريم فؤاد طلع مقلب، وبيرسي تاو مش المحترف اللي تجيبه والاهلي مفيهوش مهاجمين”.
وأضاف: “صفقات الأهلي الجديدة اللي استقبلت كولر في صيف ٢٠٢٢ كانت برونو سافيو وشادي حسين ومصطفى سعد ميسي”.
وأردف: “الشكل مكنش بيقول ان الأهلي ممكن يفوق بسرعة، ده غير انه اللي كان متوقع وبشكل طبيعي ان كولر هياخد وقت ينسجم بما انه اول مرة يدرب في افريقيا والمنطقة العربية”.
وأكمل: “قوام اساسي محدش واثق فيه وصفقات مكنتش سوبر ومتقدرش تقوم الفريق، كولر راح اشتغل على اللي موجود، عمل نسخة تاريخية من علي معلول قبل الاصابة، خلى كريم فؤاد جناح رائع قبل الاصابة في وقت كان الناس بتسأل هو بيلعب باك رايت ولا باك ليفت، محمد هاني بقى الظهير الأيمن الاساسي لمنتخب مصر، ياسر ابراهيم راح المنتخب وكان اساسي قبل الاصابة، بيرسي تاو كان افضل لاعب داخل القارة، وبعده حسين الشحات”.
وتابع: “محمد عبدالمنعم بقى مدافع عالمي، بعد ما كان مدافع واعد في الكرة المصرية، وفي عز أزمة الأهلي الهجومية على المستوى الفردي، جاله كهربا بعد ما كان مبيلعبش بقاله ٧ شهور وعنده كل المشاكل، وخلاه هداف الاهلي في افريقيا”.
وأكد: “كولر كسب بطولتين افريقيا واحتكر البطولات المحلية دوري وكاس وسوبر في سنتين ومكنش معاه افضل فريق، او بمعنى ادق فريق مش متكامل في ظروف صعبة فيها ضغط مباريات كتير، ونظام كرة محلية ميساعدش اي فريق على النجاح، كولر كسر ارقام قياسية محلية وافريقية، عملها اسطورة تدريب الأهلي مانويل جوزيه… بلاعبين اكيد مهما كبر اسماءهم مش هيكونوا اللاعبين اللي كانوا مع جوزيه”.
وأضاف: “اه صحيح كولر تراجع جدا في الموسم ده مع الأهلي وفقد السيطرة الفنية على الفريق جماعيا وفرديا بس هو خسر من باتشوكا بضربات الترجيح، خسر من الزمالك في السوبر الافريقي بضربات الترجيح، وخسر فرصة النهائي الثالث على التوالي افريقيا بهدف في الدقيقة ٩٠، كولر لم يسيء يوما لصحفي في مؤتمر، متكلمش مرة بغرور، مردش على اهانات جمهور، مكنش بيبرر دايما اي تعثر بالحكام”.
وأكمل: “كولر سيرحل عن الأهلي أكيد، بس كولر عمل تاريخ عظيم جدا في سنتين ونص، ومدرب غيره في اي مكان اخر لو عمل ربع الأرقام دي في نفس المدة هيتعمله تمثال”.
واختتم: “بكتب الكلام ده علشان حاسس ان اللي حصل مع كولر في مشهد الختام هو منتهى الظلم.. الظلم اللي غالبا شفناه كلنا في حياتنا، انك مهما تجتهد وتتعب وتنجح وتحقق انجازات، هيجي مديرك او اللي مهتمين بيك ويلوموك بقسوة مع اول تعثر.. وكأنك معملتش حاجة، ومحدش هيحاسبك حتى معنويا على مجمل أعمالك”.
من ناحية أخرى تمسك السويسرى مارسيل كولر المدير الفنى لفريق الكرة بالنادي الأهلي بالحصول على قيمة الشرط الجزائى كاملا، فى حال اتخاذ مجلس ادارة النادي الأهلي قرارا بالاستغناء عن المدرب، بعد الخروج من دوري أبطال افريقيا .
وودع النادي الأهلي بطولة دوري أبطال أفريقيا أمس، بعد التعادل الايجابي 1 / 1 أمام صن داونز ليودع الفريق البطولة على أرضه ووسط جماهيره .
وحاول مسئولو النادي الأهلي خلال الساعات الماضية من خلال المهندس خالد مرتجى أمين الصندوق التفاوض مع دينو لامبرتى وكيل أعمال المدرب السويسرى مارسيل كولر من أجل انهاء التعاقد بشكل ودى حيث يحق للمدرب الحصول على راتب شهرى مايو ويونيو فى حالة الاستغناء عن المدرب فيما يحاول النادي الأهلي الاتفاق مع وكيل أعماله بالحصول على قيمة شهر واحد فقط بدلا من شهرين الذي يقدر بـ 220 ألف دولار.
