قالت الإعلامية ياسمين عز، إن الزواج من موظفة البنك له العديد من المميزات، والرجال المتزوجين من موظفات البنك هم سعداء بشكل غير طبيعي، “يا سعدك يا هناك يا اللي تتجوز موظفة البنك، انت بتتمتع بشياكة وأناقة ومميزات مش هتلاقيها في حد تاني”.
ياسمين عز تتحدث عن مميزات الزواج من موظفة البنك
وأضافت “عز”، خلال تقديمها برنامج “كلام الناس”، المذاع عبر فضائية “إم بي سي مصر”، أن موظفة البنك دائما أنيقة ودائما مميزة، ومحافظة على شكلها بشكل تام وطوال الوقت، إذ أن البنوك يوجد إدارة كاملة مهتمة بالمظاهر الخاصة بالموظفين والموظفات في البنك.
وتابعت ياسمين عز، أن موظفة البنك تحافظ دائما على وزنها مهما مر الزمن، ستجدها دائمة محافظة على رشاقتها وجسمها، “، بطنها مشفوط، كتفها مفرود، ضهرها مشدود، رقبتها عمود سوبر موديل، عمرها ما هتتخن”.
واستكملت ياسمين عز، أن موظفة البنك أيضا من ممزياتها أن مواعيدها، “عمرها ما هتتأخر عليك، بتروح بميعاد وترجع بميعاد، يوم ما تتأخر يومين في السنة عشان تقفيل السنة المالية”.
وأردفت، أن مميزاتها أيضا أن صوتها دائما هادئ ومنخفض، “صوتها واطي دايما علطول، بحكم الاحتكاك بالعملاء، إذ أنها تتحدث بصوت واطي، وعمرها ما تنده لك في البيت غير يا فندم، ورضاك مهمتها الأساسية، بتعمل كده مع العملاء في البنك ما بالك بالفرعون في البيت، مش هتعمل كده معاك ازاي وانت أهم عميل في حياتها”.
وأسهبت، أن موظفة البنك تحب زوجها لأنه دائما العميل الأهم والعميل رقم 1 في حياتها، فضلا عن أنها هي أفضل شخص لضبط ميزانية المنزل، ” المصروف اللي هتحطه للبيت هتعرف تتصرف، وعمرها ما هتقولك الفلوس مش كفاية أو عاوزة فلوس تاني”.
وواصلت أن موظفة البنك من مميزاتها أيضا أنها تتحمل مصاريفها الشخصية ولا تطلب من زوجها أي شيء، “”هي من نفسها هتلاقي بتقولك أنا معايا زيادة هدفع، وتجيب حاجتها لنفسها، مش هتلاقيها بتقولك أنا جايبة أوردر من على النت عاوزاك تحاسب عليه، لا هي بتتعامل مع نفسها”.
وأشارت ياسمين عز: “موظفة البنك هتعملك ألف حساب، ورصيدك عندها مش بيخلص، وقلبها ليك عامل زي الخزنة المقفولة، وبتهتم جدا أنها تقفل التارجت بتاعها في الميعاد المظبوط، فمستحيل تتأخر عليك في واجبتها، سواء الغسيل أو المكوة أو الأكل أو غيره”.
وأوضحت، أن موظفة البنك هي الزوجة الوحيدة التي لا تهتم بمعرفة الأرقام السرية الخاصة بزوجها سواء مواقع التواصل الاجتماعي، أو رمز الهاتف أو رقم الفيزا أو غيره، “هي في حياتها ماشية بقاعدة أن الموظفين ميطلبوش الباسورد، وتتعامل بمبدأ نحن نحافظ على سرية بياناتك”.
