علّقت سمية الخشاب على النجاح الكبير والصادم لأغنيتها الأخيرة “أركب على الموجة” والتي طرحتها عبر منصة (يوتيوب) خلال الأيام القليلة لماضية. حيث أعربت الخشاب عن فرحتها العارمة بالنجاح الباهر الذي حققتها أرقام مشاهدة الأغنية والتي تعدت مليون مشاهدة.
وقالت سمية الخشاب خلال تصريح صحفي: “أنا عملت دعاية وصورت في البيت بلبس غير بتاع الكليب، ومن بعد نص ساعة ما نزلت الفيديو على تيك توك لقيته بيعد مشاهدات وبقى 5 ملايين مشاهدة، وفي 3 أيام على مواقع التواصل الاجتماعي مشاهداته تخطت الـ 13 مليون وده رقم أنا مكنتش أحلم بيه الكليب لسه منزلش يا جماعة”.
وتابعت سمية الخشاب: “أنا سعيدة جدًا بنجاح أركب على الموجة، والنجاح كان غير متوقع في ساعات من نزولها، خاصة أن الأغنية نزلت في وقت صح في ظل الأجواء اللي إحنا فيها وانقطاع الكهرباء والناس اللي متعودة على التكييف، وإحنا صورنا الكليب في وقت صعب أوي وفي الغردقة ودرجة الحرارة فيه 40، وكل الفنادق كانت مليانة فكان صعب إننا نصور من غير ما الناس تبقى باصة على الكاميرا كنا بنعاني من ده”.
اقرا أيضًا..بعد غياب عامين.. سمية الخشاب تتصدّر الترند في “أركب على الموجة”
وعن كواليس اختيارها للأغنية، قالت سمية الخشاب: “الأغنية جريئة وجميلة شبابية ولذيذة وخفيفة للصيف، وشيلنا كلمات وحطينا مكانها كلمات تانية، وهي مناسبة جدًا للوقت ده، وقالوا لازم تتصور فيديو كليب.”
كما علقت سمية الخشاب على انتقادات الجمهور لبعض كلمات أغنية الموجة، قائلة: بقول في الأغنية أنفخ عوامة مفسية ودي جملة عادية، بس إحنا مصريين دمنا شربات وبناخد الحاجات في الإطار اللي بيضحكنا، ودي خفة دم المصريين لازم نتوقع منهم دي، ولما جيت وقت تغيير الكلمات في الأغنية قولتلهم الكلمة دي جريئة والناس هتحط عليها كلمات، ولكن ده العادي ده كلام الشارع.
